VKM/ Nga rregullorja e hapësirave publike tek financimi i SME, ja vendimet e qeverisë
Mbështetje për biznesin, rregulla të reja për hapësirat publike dhe investime në arsim e energji.
Financim për ndërmarrjet e vogla dhe të mesme
Në mbledhjen e fundit, qeveria miratoi një paketë vendimesh që përfshin mbështetje për ndërmarrjet e vogla dhe të mesme, përmes një fondi prej 100 milionë eurosh në kuadër të nismës “Dyfisho Ndërmarrjen Tënde”. Fondi do të administrohet nga AIDA dhe synon të mbështesë sipërmarrjet mikro, të vogla dhe të mesme në zhvillimin e tyre.
Rregullorja e re për hapësirat publike
Qeveria miratoi gjithashtu rregulloren e re për përdorimin e hapësirave publike, e cila synon të unifikojë praktikat në nivel vendor dhe të balancojë përdorimin mes qytetarëve dhe bizneseve. Sipas ministrit të Shtetit për Pushtetin Vendor, Ervin Demo, bashkitë kanë qenë pjesë e procesit dhe tashmë do të funksionojnë mbi një kornizë të përbashkët rregullatore.
Në të njëjtën kohë, katër bashki të tjera, Sarandë, Kuçovë, Gramsh dhe Tropojë, kanë miratuar zonat prioritare për Paketën e Maleve, ndërsa numri i aplikimeve në rang vendi ka kaluar 500.
Vendime për arsimin dhe kërkimin shkencor
Në fushën e arsimit, u miratua financimi për tekstet falas për nxënësit e klasave 4 dhe 5, duke zgjeruar skemën ekzistuese. Për klasat 6 deri në 9, tekstet do të shpërndahen çdo tre vite, sipas një skeme të re menaxhimi. Gjithashtu, u miratua edhe mënyra e re e financimit të kërkimit shkencor, në përputhje me angazhimet për integrimin europian.
Rregulla të reja për energjinë dhe konsumatorët
Ministri i Infrastrukturës dhe Energjisë, Enea Karakaçi, njoftoi miratimin e një akti për etiketimin e produkteve me ndikim në energji. Ky akt përfshin 17 rregulla të reja dhe synon të informojë më mirë konsumatorët, të ulë konsumin e energjisë dhe të harmonizojë standardet me ato të Bashkimit Europian.
Investime dhe shpronësime për projekte strategjike
Qeveria miratoi gjithashtu një listë shpronësimesh për të vijuar investimet në projekte infrastrukturore, përfshirë zgjerimin e Korridorit VIII dhe zhvillimin e portit të ri në Porto Romano, duke synuar përshpejtimin e realizimit të këtyre projekteve strategjike.
k.jpg)